Hafan
Sut rydym yn gweithio
Cymryd rhan
Cymorth i chi
Ein cynnydd

Cyngor digidol

  • Croeso i Wefan Strategaeth Ddigidol Cyngor Caerdydd

    5 Rhagfyr 2025

    Rydym wedi lansio ein Strategaeth Ddigidol ar gyfer 2025 i 2030.

    Mae ein nod yn syml: defnyddio offer digidol i ddarparu gwasanaethau gwell, cyflymach a mwy hygyrch i chi. Bydd y wefan hon yn rhannu diweddariadau, newyddion, a ffyrdd y gallwch chi gymryd rhan.

    Beth sy’n digwydd a sut mae’n eich helpu chi

    Dros y misoedd nesaf, byddwn yn rhannu diweddariadau rheolaidd am yr hyn rydym yn ei wneud. Byddwn yn gweithio ar brosiectau sy’n dod o dan 4 prif thema ein strategaeth:

    • Dinasyddion a chymunedau
    • Cyngor digidol
    • Ein gweithlu
    • Seilwaith a systemau

    Ewch i bob adran ar y wefan i ddysgu am ein cynlluniau – nawr, nesaf a nes ymlaen.

    Pam mae ein strategaeth ddigidol yn bwysig

    I ddinasyddion a chymunedau, mae’n golygu mynediad cyflymach a symlach at wasanaethau’r cyngor – boed yn talu biliau, yn rhoi gwybod am broblemau, neu’n dod o hyd i wybodaeth ar-lein – trwy systemau diogel sy’n diogelu eich data.

    I’r rheiny sydd angen cymorth all-lein, byddwn yn cynnig gwasanaethau wyneb yn wyneb yn ein Hybiau ac ar ein llinellau ffôn pwrpasol. Byddwn hefyd yn helpu pobl i ddatblygu sgiliau digidol fel y gallant fynd ar-lein gyda hyder os ydynt yn dewis gwneud hynny.

    I’n gweithlu, mae’n golygu offer mwy clyfar sy’n arbed amser, yn lleihau gwaith papur ac yn cadw gwybodaeth yn ddiogel, fel y gall gweithwyr ganolbwyntio ar ddarparu gwasanaethau gwych.

    Trwy gofleidio technoleg, rydym yn adeiladu cyngor digidol sy’n fwy effeithlon a chynhwysol er lles y ddinas gyfan.

    Cymerwch ran

    Bydd eich syniadau a’ch adborth yn helpu i lunio’r gwasanaethau hyn. Dywedwch wrthym beth sy’n gweithio a beth sydd ddim yn gweithio. Gyda’n gilydd, gallwn wneud Caerdydd yn ddinas lle mae technoleg o fudd i bawb.

    Dewch yn ôl i gael y wybodaeth ddiweddaraf a chyfleoedd i ddweud eich dweud. 

  • Rheoli prosiectau digidol

    Rydyn ni eisiau sicrhau bod yr holl brosiectau digidol yn y Cyngor yn cael eu rheoli mewn ffordd gyson. Rydyn ni’n sefydlu canllawiau a safonau i helpu timau’r Cyngor i ddewis y dechnoleg gywir a datblygu’r sgiliau cywir.

  • Gwella sut rydyn ni’n rheoli cofnodion dinasyddion

    Rydyn ni’n adolygu ein dull o reoli cofnodion dinasyddion. Ein nod yw creu golwg fwy cysylltiedig ar draws holl wasanaethau’r Cyngor. Bydd hyn yn ein helpu i ddeall a chefnogi preswylwyr yn well, gan gadw gwybodaeth yn ddiogel.

  • Gweithio ledled Cymru

    Byddwn yn siarad â’n cydweithwyr o gynghorau eraill yng Nghymru i ddod o hyd i gyfleoedd i rannu technoleg ac adnoddau digidol. Rydyn ni am sicrhau gwerth am arian i bob preswylydd a mwy o gydweithio ar brosiectau.